حبة موضوعية لله والوطن

يوم الاتنين اللى فات 12 سبتمبر 2011 نظمنا (شباب 6 ابريل الدقهلية) بالتعاون مع قصر ثقافة نعمان عاشور حفل تأبين لواحد من شهدائنا السته اللى استشهدوا على إرضنا فى سينا بغدر
وخسةو تلكيك معهود لما تسمى إسرائيل (إلهى ما تتسمى خالص)

هو الشهيد حسن الحناط من قرية أولية التابعه لمركز ميت غمر _الدقهلية
المهم لأن للاسف مفيش فى ميت غمر قاعة نقدر نعمل فيها الحفلة إلا قاعات خاصه هتكلفنا آلاف الجنهيات وطبعا لإن صربيا لسه مبعتتش التمويل (بهزر لاحسن توفيق عكاشه يخدها إثبات ولا حاجه) فمكنش ادمنا مكان غير مسرح مجلس المدينة وبما إن مجلس المدينة ده يتبع الدولة يعنى بتاع الشعب يعنى من حقنا ومن حق نعمل فى حفل زى ده ، و لإنه طبعا كان مرتع للحزب المحظور الوطنى سابقا ،فكان مهم نعمل فى الحفلة تأكيد على أنه حق لينا مش بمزاجهم من الاخر
اول لما روحت المسرح قبل الحفله بكام ساعة لقيت موظفين من المجلس اللى هما ملهومش اى علاقه بالحفله و لا الدعوه ليها ولا اللى هيتقال فيها بيحاول يداخلوا فى تفاصيل الحفله يعنى شيل ده يا فلان حط ده ،وشويه وعاوزين برنامج الحفله ؟! علشان يطلعوا عليه؟!
طبعا رفضنا ده بشياكه و مفيش حاجه اتفرضت علينا فى الحفله نهائى
طبعا فى أثناء الحفله إكتشفنا فلول كتير جاين يحضروا لإننا الحفله مقامه فى وقرهم وكلنا عارفين فساد المحليات و الإدارات الهندسية ووو واللى بيحصل فيهم واللى لسه بيحصل للاسف يا دكتور شرف
ولإن الدعوه كانت عامه ولإن متوقعين محاولات مستميته لتشويهنا وتشويه الحفله فمكنش حضورهم مفأجأه بالنسبه لنا
وكان المهم لينا إن رسالتنا توصل رغم عنهم بل فى وجودهم
طبعا حصلت مشدات فى بداية الحفل من عينة انت مش عارف انا مين ! لمجرد ان زميل لينا كان بينظم المكان المخصص لإهل الشهيد وبيطلب من المرشح السابق لمجلس الشعب انه مش ده المكان المخصص ليه
و شوية وليقنا التليفزيون المصرى داخل يصور وطبعا بطريقة تحت رعاية سيادة اللواء فلان الفلانى ،فاعتراضنا على وجودهم و تم إخراجهم من القاعه
كل ده بقه كان مقدمه للى عاوزه اتكلم فيه إلا وهو الموضوعية فى الحكم علي الحفله واللى تحول لحكم على إشخاصنا (ومش عارف بصراحه مين يعنى عنده صلاحية يحكم على اى حد فى الدنيا )
كنت مستينه الكلام اللى هيتقال فى أروقة المجلس علينا و كنت عارفه اننا مش على هواهم
وكان الكلام اللى وصلنا من ناس موثوق فيها
دول شوية عيال فاضيه و صيع ومربينلى شعرهم (ابويا كان مربى شعره فى السبيعنات خنافس يعنى وكان من اللى اتحاصروا فى حرب اكتوبر عادى يعنى )
دول مش متربين ازاى يرفضوا اننا نشوف برنامج الحفل أمال ليه عملينه عندنا !!!! (على اساس عملينه فى بيتهم مثلا )
ازاااااااى ينتقدوا رئيس المدينه وهو حاضر (على أساس اننا هنطبب عليه والبلد حالها زباله مثلا لمجرد انه حاضر ، مش مهم خالص البلد المهم المجاملات)
الحمدلله كان فى اللى رد على كل الكلام ده ورد غيبتنا لكن انا بحكى كل الوقائع الطويله العريضه دى علشان كلمه واحده اسمها الموضوعيه
يعنى لو حد عاوز يحكم على الحفله او علينا ممكن يحكم على فقرات الحفله ممكن تحكم على مواقفنا السياسيه ، لكن الكلام المرسل لمجرد اننا اصغر سنا و تصرفنا معجبكش بشكل عاطفى وليس عقلانى يبقى عفوا لا تستحق الرد عليك او التفكير

نفس الفكره حصلت فى اليومين اللى فاتوا ولكن بصورة مختلفة على "رجب طيب أروغان" رئيس وزراء تركيا فى زيارة لمصر
وفجأة كل الناس بتتكلم على أردوغان البطل أردوغان المغوار أردوغان الزعيم
مع كل احترامى لإردوغان ومواقفه تجاه إسرائيل و غزة
و بغض النظر عن قصف الجيش التركى لإقليم كردستان
لكن ليه بنبصش لإردوغان كرجل سياسة له ما له وعليه ما عليه، ليه التمجيد فى الإشخاص .
ندرسة كتجربه نتفق ونختلف معاها ،نستفيد من السئ فيها قبل الجيد
ولا هو يعنى ملاك ملوش أخطاء ؟
و لا هى يعنى السياسه مؤسسه خيريه مش بتقوم على المصالح؟
وليه مش واخدين بالنا أن ده زمن الشعوب وليس الاشخاص ؟
بالله عليكم شويه موضوعيه فى الحكم على التجارب والافكار
و منحكمش على اشخاص خالص لانه مش من حقنا

حديث الأنثى بداخلى

نشرت تلك الكلمات من قبل على حسابى الخاص على الفيس بوك بتاريخ 17 إبريل 2011
إعيد نشرها اليوم لتصادف حديثى مع أكثر من أنثى عزيزات على قلبى يؤلمنى وجعهن الأنثوى علهن يجد بعض الراحة داخلهن،و أعتذار دائما لإنى لست تلك الصديقة البارعة فى تطمأنت القلوب ومواساتها

لحظات تمرى بى

لحظات من الخمول الأنثوى

يخالطه الفرح و الألم فى نفس اللحظه

خليط من المشاعر و الهدوء

يدفعنى هدير الموسيقى إلى الكتابه

أحب تلك اللحظات التى أنسى فيها العالم من حولى

أغمض عينى

و أستمع الى الأنثى  بداخلى

لا صوت يعلو فوق صوتها

تتحدث إلى عن ذاك الألم الذى يلف بها يعصرها و يدميها

و لكنها تنظر إلى فى أمل و تقول لا بأس سننجو من ذلك الطوفان

غدا يوم أجمل

أحبها تلك الأنثى بداخلى

لا بل أعشقها لا تعتبرون هذا نوعا من النجرسيه وحب الذات

فأنا استمد كل طاقتى منها

عندما أفقد كل شئ لا يبقى لى ألاها

تحنو على  وتحتضنى و تمسح دمعات

و تعدنى دائما بالأفضل و الأجمل و الأبهى

صديقاتى لا تنسو الأنثى بداخلكن إستمعوا إليها و عيشوا بها عودوا لها إن غبتن عنها و حدها ملذكن الأخير و الأفضل دائما  

هجوم فيروزى

تقنع نفسك أنك قد شفيت، لن أقول نسيت لأنى لا أؤمن بالنسيان فى الحب.
 الحب لا ينسىى، فقط يختفى قليلا من أوراق ذاكرتك يصبح ورقه من الأرشيف لكنها لا تنمحى أبدا. تجلس مع نفسك دقائق فى محاولة للإسترخاء مسمتع بهدير الموسيقى المتدفق و صوت فيروز العذب، دقائق بين أحدث  يومك المتسارعة، - فيروز تغنى لك إحدى روائعها- فتظهرعلى سطح ذاكرتك ورقه من الإرشيف، ورقه بطعم الفرح، تتذكر عندما رن هاتفك  معلناً وصول رسالة نصية بها كلمات تلك الإغنية، إحساسك بها،لا بل إحساسكما. كم كان صادق، سلسل ورقيق!
تتذكر ردك، إدركك أنه كان يستمع إليها فى لحظتها ويفكر بك وكيف هممت للإستماع إليها. وقتها كنت تسمتع بفرح ،بقلب ينبض أمل وحب. إما الآن وقد آتى هجوم الموسيقى والكلمات هجوم فيروزى المذاق، آتى مفاجئ ليهز كل كيانك، ليهز قلبك الذى كان يدعى الشفاء فتنزل دمعتين من مقلتيك، فلا تجد مفر من إن تمسحمها  لتدعى من جديد الشفاء.

اهى طلعت تفاؤل

عاوزه اكتب و اتكلم  حروف و كلمات  تبعث على التفاؤل،عاوزه ابقى بنور تفاؤل وامل وحب وحاجات حلوة
كتير بس مش عارفه ليه عماله ابص على المشاكل ،كل لما افكر فى حاجه اكتبها تطلع مشكله اجتماعيه ، سياسيه ،دينيه ...الخ
مشاكل مشاكل مش عارفه الاقى حته منوره

مع انى جواى اليومين دول طاقه تفاؤل وإيجابية  كبيره اووى بسطانى و محسسانى انى طايره فى الهوا
ببقى الشارع ولا فى اى مكان عام حاسه انى عاوز اطير واتحول لفراشه
حاسه ان الحروف هربانه منى و المعانى و الافكار مش واضحين اووى فى دماغى،هما موجودين عمالين ينططوا زى العيال الصغيره بس مش عارفه اركز

فى مراحل كده فى عمرنا بنحس فيها بتحول وان فى حاجات بتتغير جوانا انا حاسه بكده

حاسه انى بقالى فتره فى نفق طويل كان مضلم وبارد وكان فى ازاز على الارض ماشيه عليه كان موجع اووى بس حاسه انى دلوقتى فى منطقة تانيه النفق قرب يخلص و النور ابتدى يبان و ابتديت احس بدفى الشمس و الوجع بيخف حاسه بيه بيخرج منى
و على اد ما النفق ده توهنى و تعبنى على اد ما انا مبسوطه بنفسى دلوقتى حاسه انى احسن

حاسه ان حصل فيا اختلاف وتغيير حصل بوجع بس جميل ومفيد، حلو ان الحياة تكون معلمه على روحك وقلبك وعقلك ،و اجمل ما فى الحياة انك قبل ما بتكتشف اى حاجه وانت ماشي فى رحلتها  فأنت بتكتشف نفسك

ورغم ان فى حاجت ضاعت منى فى زحمة الطريق  بس عندى إيمان أنى هعرف ارجعها تانى او حتى لو مرجعتش كل وقت وله جمال مختلف عن اى وقت تانى المهم انى افضل شايفه الجمال ده

ممكن يكون الكلام ده لا يعنى اى شئ لناس كتير بس انا حطيته هنا علشان لو حد فى النفق يعرف ان فى ناس تانيه عدت من هنا وانه مش لوحده وان دى حلوة الحياة

إيه ده باين كده أنا كتب حاجة تبعث عن التفاؤل ....الحمدلله***

شوية روقان

بعد دور انفلونزا شديد ورخم يصحبه حبه سخونية  ويومين فى السرير بتتعافى منه بالتدريج و بتبقى مؤدب اووى وانت بتتعامل مع المياه الساقع ،الايس كريم ، الدش السخن ، وخلافه
خوفا من انتكاسه ملهاش اى تلاتين لازمه وطبقا للمثل المعروف اللى اتلسع من الشوربه ينفخ فى الزبادى .

هو ده بالظبط كده اللى انا حاسه بيه بعد حاله نفسيه زى الزفت ( الله لا يرجعها و يدوم علينا نعمت الروقان شويه)

عندى خوف  من الانتكاسة فعماله استعبط على الاخر و ابتسم فى وش اى حد مضايق و اعمل نفسى مش واخده بالى خااااالص انه بيحكيلى عن مشاكله تؤ تؤ تؤ تؤ نهائى

و اذا كان ولا بد و حسيت بذنب يعنى تلاقينى برد بجمل مقتضبه بتبعث على التفاؤل وبس

جمل كده امثال (كله بيعدى- احلى بكره لينا- اضحك اضحك محدش واخد منها حاجه ) وكده يعنى

ممكن حد يشوف ده نداله ،احتمال وارد بس مش مهم خالص انا مركزه على حالتى وبس لحد ما تبقى كويسه كده ومتامسكه واعدى مرحله الخطر و الانتكاسه وارجع اكل ايس كريم و الدنيا بتمطر تانى J

اى كلام

- ازيك يا حبيبتى؟ كويسه؟ لسه بتروحى مشوار شغلك البعيد ده كل يوم ؟؟؟ (وش بائس الدمعه هتفر منه)

- الحمدلله . لا يا طنط أنا سيبت الشغل J

 سبتيه؟ لييييييييه كده يا بنتى هو حد لاقى شغل ؟ يلا يعنى كنتى بتقبضى كام؟ ده القطاع الخاص ده بيمص دمكوا و بس هتلاقى مرتبك كان بيضيع مواصلات وأكل

 كلامك صحيح يا طنط بس أنا سبته علشان معتش بيضفلى حاجه،وما بتطورش فيه -

- !!!! و مجلكيش عريس من الشغل ده

-   /:)مكنتش فى العقد دى يا طنط

- طب ما تشوفى الوزارة اللى محتاجة موظفيين قدمى ؟ حد لاقى شغلانه فى الحكومة؟

- من ناحية محدش لاقى فهو محدش لاقى بس هشتغل ايه فى الحكومه؟؟؟

- أى حاجه يا حبيبتى هتروحى من 9 ل2 وبعدين أصلا الموظفين زياده يعنى لو كتبتيلك ورقتين على الكمبيوتر يبقى خير وبركه و اقرى بقه الجرايد باقى اليوم

 - بس انا مبحبش قعدة المكاتب دى يا طنط

- يعنى مش أحسن من قعدة البيت الممله؟

-  إن شاء الله بفكر فى كذا حاجه احتمال أكمل دراستى

- ااااااه يلا اديكى بتتسلى

 - بقول لحضرتك هدرس مش هتفرج على المسلسل

- ربنا يوفقك يا بنتى و يرزقك بابن الحلال اللى يريحك من الهم ده 

- !!!!! وهنا سكتت شهرزاد خالص علشان معتش ينفع الكلام المباح خالص  >:)

اتجوزى قبل ما تتجوزى

ايون العنوان مظبوط مش اتجوزى قبل ما تعنسى" مفيش حاجه اسمها تعنسى اصلا" ، دى دعوة بتوجه طول الوقت من بعض أفراد المجتمع  للبنت اللى عندها إهتمامات كتيرو شايفه انها كائن مفيد و له لازمة فى المجتمع و ان مينفعش يوم يعدى كده من غير ما تعمل حاجة و بتفكر طول الوقت فى مستقبلها المهنى و عندها أحلام و إهتمامات مهمة فى الحياة .

"مش عايز حد يقولى يعنى هى المفروض المتجوزة متبقاش كده ده نتكلم فيه بعدين"

ايه بقه المشكلة؟؟؟،المشكلة أن الحمدلله  فى بنات كتير عايشين بشكل طبيعى زى إى بنى آدم لسه مش موجود  فى حياته ما يسمى بشريك الحياة  وناس تانية بيطالبوا البنات دى إنهم يعيشوا وكأن شريك الحياه ده موجود طب ليه يعنى؟؟؟

يعنى بنت مش متجوزه ليه يتم انتقادها لانها مهتمه جدا بمستقلبها المهنى و بتدرس وبتطور نفسها؟

ليه تبقى منتقده من جانب بعض افراد المجتمع  لانها بتشارك فى نشاط سياسى ما و بياخد كتير من وقتها ؟اذا كان الوقت متاح؟

ليه يتم الحكم عليها انها هتبقى زوجة وام فشله لمجرد انها فى اللحظه اللى لا هى فيها زوجه ولا ام معندهاش وقت فراغ؟

ليه بيتبصلها بعين ونص كده وهى بتتكلم عن حلمها الكبير على اساس انها مش هتبقى فاضيه بقه تهتم ببيت و زوج واولاد؟

ليه الناس دى بتستغرب انها بتشتغل 8 و 9 ساعات وبتقضى كمان ساعتين ولا حاجه مواصلات و بتكمل يومها فى اهتمامات تانيه؟

هل ده معناه انها لما تبقى زوجه مثلا اكيد ولازم ولابد مش هتهم بجوزها !!! او لما تبقى أم هتسيب ابنها ولا بنتها فى الشارع ومش هتبقى فاضية تربيه؟؟؟

و بما انها بتتكلم بالشكل ده عن طموحها تبقى مش بتفكر ازاى هتسعد شريك حياتها ومبيجيش على بالها خالص أزى هتربى ولادها ؟ ولا عندها خطط لكل الحاجات دى!!

 

ياا ناس كل مرحله وليها اولويتها ومهامها و شئ مجحف جدااا انك تحكم على اداء حد فى موقف لسه مبقاش فيه ، وحاجه كمان يعنى للزمن ملكش دعوه بحياة حد خليك فى نفسك احسن ليك وليهم

كلمة للبنات اللى بتتعرض لانتقاد السخيف ده : ولا تفكرى لثانية فى الكلام ده، الخبرات اللى بتاخديها كل يوم أهم من كل النصايح اللى الناس اللى بالشكل ده بتقولها و هى دى أكتر حاجه هتفيدك : كزوجة و كأم .