2013 عيش

فى مستهل السنة الجديدة إليكم مجموعة من الأمنيات المستحلية التى لن تتحق

الريس مش هيخطب ولا خطاب واحد
البرادعى هيعمل داكتفيت لحساب توتير
الناس اللى معصرتش ليمون هتبطل تخنق على الناس اللى عصرت ليمون وتذلهم بمدى الحكمة اللى تحلوا بيها بمقاطعة الإنتخابات أو إبطال أصوتهم.* ملحوظة أنا من المبطلين
طريق القاهرة إسكندرية  الزراعى مش هيجى  فى يوم ويقف 12 ساعة متواصلة
المواصلات سعرها مش هيتغير مرتين فى اليوم الواحد
اللحمة مش هتغلى  فى عيد الأضحى
إسكندرية هتبقى رايقة فى الصيف
أنبوبة الغاز هتبقى موجودة على بطاقة التموين،على بطاقة الرقم القومى بس نشوفها 

الكهربا مش هتقطع  وخصوصا فى رمضان على الفطار
الناس هتستحمى كل يوم صيف شتا كل يوم كل يوم

رمضان السنة دى مفهوش مسلسلات. فيفى عبده مش هتتجوز ولا أحمد السقا هيموت كل الممثليين

كل طنطات الفاضية اللى بتشتغل فى وقت فراغها خاطبة هتختفى  
الناس اللطيفة اللى تبقى بتتناقش معاها فى مشكلة فتبص فى الفراغ وتنزل عليك بحلول نموذاجية وردية مثالية هيتجننوا
البنات اللى بيلبسوا خوذة قبل الطرحة هيخفوا وراسهم هترجع لحجمها الطبيعى

النوتلا هتبقى على بطاقة التموين مع أنبوبة الغاز
مش هننبهر تانى من اى تصريح لسياسى ولا من اى حدث مش هننبهر تانى يا منى
مش هنقرا خبر فى كلمة وصرح عبر توتير أو أكد عبر فيس بوك
القنوات الدينية هتقلب قنوات طبخ
مش هتقابل توكتوك فى وشك ماشى عكس اتجاه على الطريق السريع
بعد المطر الشوارع هتبقى نظيفة جدا زى شوارع امريكا بعد أعصار ساندى بالظبط
أغلى كتاب هيبقى ب20 جنية

مارك زوكربيرج مش هيغير اى حاجة فى الفيس بوك طول السنة
هتختفى وظيفة ناشط سياسى
فيلم الطريق إلى إيلات مش هيتذاع يوم 6 أكتوبر

إما الآن فإليكم بعض من الأفكار التى ستهون علينا الامنيات المستحيلة

اطبخ حاجة جديدة من وقت للتانى وأعزم عليها حد من أصحابك أو عيلتك
صلى الفجر فى المسجد لو مسلم أو أحضر قداس الأحد لو مسيحى ولو ملحد بقه يا معلم فصلى فى معابد الملحدين اللى لأول مرة فى مصر فى 2013

صاحب طفل صاحبوا بجد متتعملش معاه كعيل صاحبه واستفيد واتعلم منه.
اخرج انت واصحابك ومتستخدموش الاسمارت فون طول الخروجة
اتعرف على شاعر جديد وأقضى أيام فى قرائته وهكذا مع موسيقار
اتفرج على فيلم لتشارلى شابلن
هات لحد هدية وليكن سى دى لفرانك سيناترا

أعزم أصحابك على قهوة فى البيت وأعمل قاعدة فى البلكونة وشغل قايمة أغانى بتحبوها
أخرج لوحدك وأشتريلك هدية

صدق قلبك
خد أعز أصحابك من دراعه  وأمشوا  فى أحب الشوارع لقلبك وغنوا
أجر مركب فى النيل وانفخ بلالين كتير وطيرها
أرقص أرقص أرقص
أسهر
وعيش حب الناس وعيش J

توهان

روحى مخنوقة وبتوجعنى اوى احساس توهان جوها تعبنى بس المزيكا دى بتطبطب عليها 

Dance me through the panic till I'm  gathered  safely in 

   

pain

Nobody can deal with my pain even I 

My person 2

My person: may be I know you, may be not, but I am sure I miss you.

My person

May be I am not the perfect lover or friend, but I am trying. So be my lover, be my friend. 

اختياراتى

عمرك حسيت ان اختياراتك الصعبة بتبتسملك ؟! :)

خذلان

الخذلان طعمه مر، ذقته كثيرا لكنه يضربنى من جديد فأدرك أننى لم أتعلم بعد.
البشر أنانيون يا زينب، قلبك لا يتحمل كل هذا البؤس. أتعلم فآنأى بقلبى ثم لا يلبس أن يتعلق بهم.
البشر يقولون أنهم أحرار طالما الحرية تخدمهم، لكنهم لن يأثروا حريتك على ما يرغبون به.
الأنصاف ليس من طبائع البشر، العطاء ليس من طبائع البشر.
ستتحدثين وتتحدثين وتظنين أنكِ نجحتِ وأنهم يحترمون رؤيتك وعقلك وحريتك، وعند أول أختبار سينهار كل ذلك.ستغفرين وتغفرين ثم تخذلين من جديد. لن يقويك سوى نفسك يا زينب
أهربى بقلبك بعيد عن البشر.

وجع

لو أعلم من أين يتسرب هذا الوجع؟! لوجع تشرين طعم آخر.

نفسى

شوية حاجات نفسى فيها إلى جانب حلمى اللى أنا عايشاله.

-نفسى اصوم بالصمت وليكن 3 ايام مكلمش اى حد 

-نفسى مخ يبطل تحليل كل صغيرة وكبيرة يوم واحد بس

-نفسى اشرب فنجان قهوة مع فيروز فى الغالب مش هلاقى كلام فعقد ساكته اتفرج عليها 

-نفسى اشوف الارض من برة العلماء بيقولوا ان منظرها خلاب والبس بدالة الفضاء البيضة دى وميكونش فى جاذبية واطير فى الفضا واطلع القمر واتمشى بين صخور واتفرج على الارض من على سطح القمر 

نفسى اوى احقق الحلم ده نفسى يبقى معايا فلوس كتير علشان كده وناسا تسمح برحلات للناس العادية لازم يعملوا كده

-نفسى اروح مكان كله تلج والعب فى التلج علشان الحر من اعدائى 

-نفسى افرح اوى لدرجة انى مصدقش وافتكر انى بحلم

-نفسى يرجعلى نص الباور اللى كان عندى من 3 سنيين فاتوا L بس تقريبا الشاحن ضايع جربت شواحن كتير بس مظبطوش

-نفسى اعزم نهاد على نهائى رولان جاروس وهى تعزمنى على ايس كريم فى الشانزليزية

-نفسى ازور قصر الحمرا واقرى وانا هناك الاشعار اللى كتبها نزار قبانى وهو هناك 

-نفسى انظم مهرجان  موسيقي من الصبح لبليل يكون فيها (فيروز- منير- نصير شمه- مارسيل خليفة- يانى-ماجدة الرومى –زياد سحاب- سعاد ماسى-كاظم الساهر-Adele  وغيرهم )يوم يبقى كله موسيقى

-نفسى اروح مرسم مع اصحابى المجانين ونعقد نشخبط بالالوان علشان مبعرفش ارسم بس عاوزه استمتع بالالوان 

-نفسى اروح كاريوكى كافية واغنى لحد من قلبى 

-نفسى اروح مع فريق من علماء الحفريات وهما بيدورا بين الصخور على حفريات من آلاف السنين

-نفسى اعيش فى بيروت شويه

-نفسى اسوق فى طريق على البحر معرفوش انا والمزيكا والسواقه والبحر والطريق وبس

فرحة ما تمت

خروجوا التلات بنات يشتروا حاجات الافراح، عروستين والتالتة صحبتهم. وخناق  على لون الفستان،ومناكفه على شكل الطرحة.قعدوا فى الكافية ياخدو قهوتهم بعد اللف. على وشهم تعب المشاوير وفى قلوبهم فرحة بيحاولوا يشقولها طريق فى وسط بلد اخبارها اللى مسيطرة على حياتهم بتاكل أجدعها فرحة. ضحكوا حبه وفكروا حبتين فى بكرة اللى جاى واللى مش عايز يجى. 

 واتفرقوا التلات على امل يتجمعوا مع الفرحة فالميعاد بس الفرحة كان ليها رأى تانى :(

أساس

بقالى كام يوم عاوزة اكتب فى اللى بيحصل افكار كتير فى دماغى حاولت اكتبها وفى الآخر لقيت كل الكلام  بيعنى جملة واحدة.

كل مؤسسات الدولة فاسدة لما نبقى كلنا بنشتغل مع بعض على هذا الاساس هنفلح ان شاء الله 

Malala

I'm sorry Malala. I wish I could do something more than crying and praying for you.

Vision and Passion

Vision and Passion, that's all I need to achieve my Dreams. 

الخريف 2

الحب رزق،اطلبوا من الله السعه فيه إذا حل الخريف

الخريف

 الخريف فصل الحنين إلى كل ما كان جميل

Message from Syrian mother

I received this message from my Syrian friend Dina. Please help Syrian people and spread it.

I am a Syrian citizen . I had a normal life like any of you. Used to go to work everyday, get online to get in touch with friends and family , go out shopping, or just simply hang out with friends . Sometimes even go out on short trips. ... I was forced to accept corruption , oppression and violation of simple human rights . But at the end of the day, this was the life style of a normal Syrian citizen .

Today I can tell you the difference between types of bombs, missiles and riffles just by listening to the explosion and echo sounds. I can tell what is a fake sound in the Hollywood movies and what is real .

My two kids used to go to school and summer camps just like yours. This year they had to learn new skills, they went to special training to learn how to hide, how to avoid explosions and how to cope with the scene of blood all around . They also had to learn how to be calm and act quietly if they saw me lying dead and what to do and who to call from relatives. My 6 year old could understand and asked questions. My 5 year old could not grasp it. And still poor baby wakes up everyday with nightmares from what they see as everyday life now. Going to school like all kids around the world is out of the question now.

I am grateful to God that we still live in our house and not in a make shift shelter in a school or a refugee camp tent. I am grateful that I do not have to beg for my kids dinner or mine.

I am a civilian living in a war zone ! I have basic rights like all humans on earth. I am not asking u to put yourself in my shoes, but to pray for us.

I wonder everyday when I go out to buy groceries to feed my kids, will I be able to come home safely and find my home, and see my children again ?

If you were in my situation and I was reading your post asking for help , what would I do ?

Please write a letter to your government and ask them to pressure the international community and put real pressure on the war crime criminal maniac Assad . Stop killing the civilians for the sake of control and power everyday .

Is it too much to ask you to go out of your way and help me to ask for my rights as a human being ? The right to live safely as a civilian citizen ? Will you reach out to your government and help my children ?

Syrians and lots of Arabs and citizens of the world are going out in the streets to raise awareness in most countries across the globe . Please help us. Do something . Share this with the rest of the world ...

ما بين مجتمع الغواية ويوتوبيا التحرير

مشهد 1

بتعيطى ليه يابت

أحمد اللى قاعد جنبى فى الديسك ضربنى النهاردة واحنا بنلعب فى الفسحة

طيب خلاص بطلى عياط وأنا هكلم مامته اقولها

مشهد 2

بعد 6 سنيين

أنا مش فاهمه يعنى ايه  مدرسة بنات بس طب وأحمد اللى فضل جنبى 6 سنيين ابتدائى؟! بنذاكر ونلعب و نتخانق ونتذنب كمان مع بعض ؟!

أنتى هبلة يا بنتى مدرسة بنات بس علشان أحنا كبرنا خلاص، ماما قالتلى كده دى حتى منعتى  من اللعب مع اصحابى فى 
النادى. قالتى خلاص اكبرى بقه أنتى بقيتى آنسة بطلى تنطيط وسط الصبيان أنتى واصحابك ؟!!

ايوة يعنى مش فاهمه هيكلونا يعنى طب ما بابا راجل واخواتى والمدرسين وقرايبنا، وعمو البقال، هما الولاد لما يكبروا بيتحولوا يعنى بيخافوا علينا منهم؟!.لما قولت كده لاخويا الكبير قعد يضحك ويقولى لا دول بيخافوا علينا احنا منكوا يا بنات حوا

مشهد3

بعد 9 سنيين

ايه يا بنتى ايه اخبار شغلك ؟

كويس بس فى واحد زميلى كده مش فاهمه هو عاوز ايه؟

ماله يعنى عملك ايه؟

 بيعملنى كويس أوى ومهتم بيه وبيحاول طول الوقت يفتح معايا كلام
وبعدين ؟

وبعدين ايه ؟! بقفل أنا فى الكلام طبعا؟

ليه يا بنتى؟

كده هو فاكر ايه أنا سهل كده اى حد يتكلم معايا؟

اه صحيح ازاى يعمل كده مخدتش باله انك سفير فى هيئة الأمم المتحدة؟! وبعدين فى ايه يا بنتى ما جايز أصلا بيكلمك عادى أنتى اللى مخك بيحدف

عادى يعنى ايه عادى!!

عادى يعنى بيكلمك كبنى آدم يعنى من غير أغراض، وحتى لو له غرض ما غرضه شريف يا حاجه مالك فى ايه؟

ايوه ايوه خليكى أنتى فى الكلام بتاع الكتب بتاعتك والناس اللى بيلبسوا نظارات اللى  بتعقدى معاهم دول، قال كبنى آدم قال أنتى هبل’؟ .عموما كده ولا كده أنا هقفل عليه فى الكلام لو له غرض يبقى يكلم ابويا

يا بتاعه أنتى هو بإسلوبك المتخلف فى التعامل ده هيفهم منه أنك مش طايقه وحتى لو عاوز يتقدملك هيتردد

يا سلام ما أنا لو معملتهوش بتجاهل وقفلت عليه هياخد عنى فكرة غلط

والله أنتى كلك غلط انتوا يا بنتى بتتقابلوا فى الشارع انتوا فى مكتب واحد أصلا. صبرنى يارب

مشهد 4

إزيك يا حبيبتى ايه اخبارك؟

زهقانه وهطق

ليه بس، ده أنتى لسه مخطوبة من أسبوع لحقتى تزهقى؟!

أصلى سبت الشغل؟

ليه يا بنتى؟

مهو خطيبى مش عايزنى اشتغل، مبيحبش الأختلاط وعايز يستتنى فى البيت J
 

هو يا بنتى مش زميلك فى الشغل؟ وبعدين أنتى بتضحكى ومبسوطة على ايه انتوا عاوزين تجننونى

اه زميلى بس أصله  بيقولى الرجالة فى الشغل بتعقد تتكلم على البنات ويقولوا دى حلوة ودى وحشة وأنا محبش حد يتكلم عليكى، وطبعا اتبسطت بقه، بيغير عليا

امممم طيب خليه يخبيك فى البيت بقه اوعى تخرجى لأحسن حد يشوفك

مشهد5

بعد سنتين

ايه يا بنتى بتعيطى ليه ومال منظر كده أنتى مبتنميش ولا ايه؟

أنام؟! أنام ازاى أنا قرفت وزهقت من دى عيشه على الجواز وعلى اللى بيتجوزوا ويخلفوا، الواد ولا كإنه ابنى لوحدى حتى مبيشلهوش منى ساعة أنام ،وياسلام لو جه ملاقش أكل، رجاله كلها أنانية مبيفكرش غير فى أكله ومتعه وبس وأنا مش مهم بحس بإيه ولا بتعب أد إيه ولما اتكلم معاه يقولى زعقى زعقى ويسبنى ويمشى

مهو أنتى لو بتتكلمى معاه بشكلك ده حقه يطفش صراحه

********

شوفت يا معلم الموظفة الجديدة ؟!  مش المناظر اللى فى البيت.

بقولك ايه اتكلم بأدب

 ايه هى الصنارة غمزت؟! يا ابنى خليك بعقلك متعملش زى أخوك دول بيتحولوا بعد الجواز اسألنى أنا. لسه الصبح "سيب فلوس هات بامبرز وانت جاى هو ابنى لوحدى أنا تعبت" اسطوانة لا تنتهى

لاء بصراحة وأنت اللى بقيت قمر بعد الجواز بكرشك ده .

*******************************************************************

رئيس جامعة المنصورة ينفي قرار منع الاختلاط.. وعميد "الطب": راعينا الفصل لتعذر الحركة

مجتمعنا للأسف مليان عقليات مبيحكمهاش غير فكرة واحدة وهى الغواية،الرجالة لازم تخاف من الستات لاحسن تغويهم وتوقعهم فى  شراكها، والستات لازم تخاف من الرجالة لأنها مش عاوزه منها غير حاجة واحدة بس.علشان كده لازم منحطش البنزين جنب النار لأن الأتنين خطر على بعض.

مجتمع بيبصلنا على اننا خطر على بعض، فى نفس الوقت عايزنا نتجوز وننشأ أسر ناجحة، ثم بعد كده يلومنا لو فشلنا فى المهمة دى، ويحتقرنا لو طالبنا بإنهائها. ويحاربنا لو حاولنا ننتمرد على قيوده المتناقضة، ولازم ولا بد علشان ينجح فى الأنتصار علينا أنه يلبس توب الدين علشان كلمته تاخد قدسية  ويطردنا من جنته.

لومتعلمناش من الثورة هنتعلم منين؟ لو محولناش 18 يوم الأولى إلى نموذج نمشى عليه، هنطبق اى نموذج؟! وهل فى نموذج أوضح وأعظم من كده يعبر عننا وعن هويتنا؟ 18 يوم كانت البنات بتنام على الأرصفة ومحدش بيص عليها حتى بعينه! 18 يوم البنت مكنتش خايفة من الولد جنبها كانت بتجرى تسعفه! 18 يوم كنا بنتعامل على الأساس المشترك ما بين اننا بنى ادمين قبل اى اختلاف بيقسمنا؟!
ويفضل السؤال: امتى هنقوم بثورة مجتمعية؟؟؟     

رسالة مع نجمة

كل أحداث النهاردة بتبعتلى رسالة فحواها أن الحاجات الجميلة اللى شوفتها ومطلتهاش وكنت متخيلة أن مفيش أحلى من كده،طلع فى أحلى منها

اليوم اللى بدأ بسيل ذكريات أتخبطت فيها بالصدفة، أنتهى أن الجاى أحلى من اللى فات.

حتى النجمة صحبتى والقمر،اللى كل يوم بطلع أشوفهم وبيكون كل واحد منهم فى حته واتفرج واستمتع على منظرهم الرائع واتبسط

النهاردة قريبين اوى من بعض هلال وفوقية نجمتى وكأنهم بيقولولى أحنا النهاردة أحلى من أى يوم شوفتينا فيه

رسالة ان الوجع اللى بيعدى هيجى وقت واحس سعادة تغطى على طعمه،مستنية أعيش الأحلى من اللى فات

أحلى بكرة ليا :)

شروق

شَاهدت ذلك الفيلم المحبب لها حتى بدأت أشعة النهار الأولى فى البزوغ. أنتابتها رغبة عارمة فى مشاهدة شروق الشمس وكأن شئ من أعماقها يقودها نحو الشرفة. أسدلت شعرها البنى كالشيكولاتة على كتفيها وتوجهت نحو الشرفة باستسلام.
ما أن فتحت أبوابها حتى شعرت بدفء الشمس على وجنتيها، ثم تسرب إلى قلبها لأول مرة منذ زمن بعيد. حدقت فى ذلك القرص البرتقالى البهيج  حتى لمعت عيناها، ظلت واقفة تنظر للشمس وتبتسم وكأن شئ ما يحدث داخلها لا تدرى ماهيته. دارت 

عائدة إلى غرفتها وعلى وجهها علامات الدهشة والإبتسام ثم قالت " لقد أختفى من داخلى تمام!!!

1 ايلول 2012

تناقضات حب

ده جزء من قصة بكتبها،معرفش بنشره دلوقتى ليه؟ غير أنى عاوزة أنشره :)

عمرى ما حسيت احاسيس متناقضة كده زى ما حسيت فى احداث محمد محمود "الموجة التانية من الثورة

تتخيل نفسك مصاب فى الثورة و معتصم علشان مش عارف تتعالج فتتصاب تانى!

انك تشارك فى ثورة عظيمة العالم كله مبهور بيها علشان بعد كام شهر تتضرب تانى و تتهان تانى!

انك فى لحظة تتقتل وانت بدافع عن حرية وطنك،تنتهى حياتك واحلامك فى لحظة فتترمى على الزبالة و يتقال عليك بلطجى بدل شهيد

احساس شديد بالقهر و فى النفس الوقت احساس بتفاؤل ان الثورة دى مش هتموت وان فى لحظة الميدان بيتملى و بيرجع تانى يصرخ فى وش الظلم و ترفرف فى لحظة رايات الحرية 

فى لحظة يتجمع العشاق ويتحولوا لمحاربين ضد كل واحد يتخيل بس اننا ممكن نتخلى عن حريتنا

احاسيس متناقضة لفتنى و كانت بتحركنى،احاسيس عن الوطن،الثورة ،بكرة ،وعنك

احساس انى هموت من الخوف والرعب عليك وانت فى شارع محمد محمود وانا فى الميدان رعب من حرب دايرة رصاص و مطاطى خرطوش وغاز اعصاب وميكرفونات دايرة تذيع وتقول بلطجية،خونة،خربوا البلد،واهل بيقولوا كفاية كفاية 

كنت حاسة انى ام هتموت على ابنها وبيحركها بس خوفها عليه كنت عاوزه اجرى على محمد محمود واخطفك من وسط كل ده 

وفى نفس الوقت حاسة انى عاوزه ازوقك علشان تكون فى الصف الاول واقف وصامد بتدافع عن ثورتنا عن وطننا عن حريتنا وعنى،كانى زوجة فخورة بزوجها وعاوزة دايما فى القمة

كنت حاسة انى واقفة تاية من غيرك زى بنت ضاعت من ابوها فى وسط صوت رصاص وجرى ودم وصريخ

حتى احاسيسك المتناقضة كنت حساها

تعبك و يأسك من كل الخبطات اللى بتحصلنا كل يوم،اصرارك اننا لازم نكمل وهنتتصر ولو بعد حين

خوفك عليا وانا مصرة ادخل شارع محمد محمود واقف وسط الناس اللى بحس انهم اهلى انى منهم وهما منى 

و نظرة فخر وحب فى عنيك بيا

احساسك وانا داخية وهموت من الغاز و ضحكنا بعد ما بقيت كويسة 

بكا وضحك وجع و فرحة وخوف وشجاعة وخناق و حب 

فعلا الحب فى زمن الثورة

14.12.2011

شايفاك انا اخضر

فريق يقول ده كله اسود

وفريق يقول ده كل ابيض
وفريق مغمض وفريق مبرء
وانا واقفه شايفه نصين واكتر
ده نص ابيض وده نص اسود
لكنى مش شيفاك رمادى
شايفاك انا اخضر
وعيونى تبكى
والروح تهدهد
والقلب يحزن
والشفه تضحك
مجنونه اه
وغيبة يمكن
والطيبة غالبة
والعقل يجرى
والروح تصرخ
فعيونى تبكى
والروح تهدهد
والشفة تضحك
وعيونى تبكى
شايفاك انا بعيونى اخضر

لسه فيا نفس احارب العسكر والظلم والغباء والمتحرشين واصحاب العقول الجامدة والارواح الغافلة لسه عندى طاقه احب واجرى واضحك وابكى واحلم واحقق لسه عندى قوة اقع وقوم واتكسر واتجبر وافرح واقاوم ولسه ياما فى عمرنا

اسلاحتنا وإعلانتهم

 الكلمة

قبل الثورة كان سلاح من أهم أسلاحتنا فى كسر الخوف" الكلام"

(الكلمة إيد الكلمة رجل الكلمه باب الكلمة نجم كهربية فى الضباب الكمله كوبرى صلب فوق بحر العباب الجن يا احباب ما يقدر يهزموا، فتكلموا اتكلموا اتكلموا) صلاح جاهين

كنا بنتكلم ف اى حته فى التاكسى فى الشغل فى الجامعه فى الميكروباص فى الكافيه 

كنا بنتكلم مع بعض مع اصحابنا مع اهلنا مع السواق مع البواب حتى مع نفسنا

التكنولوجى

المساحة اللى جمعتنا وعرفتنا على بعض ورتبت افكارنا وتحركتنا وشاركت ولسه بتشارك بشكل كبير جدا فى وصولنا لبعض وفى فضح نظام ديكتاتورى، الشباك اللى فتحلنا تجارب العالم واتعلمنا منه كتير وعلمنا كمان كتير 

18 يوم الاولى  للثورة

 كنا مختلفين شكلا وموضوعا بس كان عندنا حلم واحد

 مكنش فى بنت وولد بس كان فى انسان

مكنش فى مسلم ومسيحى كان فى مصرى

مكنش فى ليبرالى واسلامى وسلفى كان فى وطنى

حتى كان فى اخواتنا فى الحرية من جنسيات تانيه معانا فى كل الميادين صحفيين ومصوريين و و و 

كان ولا يزال من اهم اسلاحتنا الكلمة وقبول الاخر وانفتاحنا على بعض

حتى ولو بعد شويه الكلمة اتحولت لخناقة واتخلنا شويه عن قبول الاختلاف 

بس عدونا مش اهبل عاوز يرجع الناس تسكت تانى وتخاف تانى 

التليفزيون المصرى مخترع الكذب والتلفيق والتضليل،التليفزيون المصرى المشترك من اول لحظه فى الثورة فى دم الشهدا والمصابين العصايا السحرية اللى بتقلب الناس علينا، السلاح اللى لسه على رقابتنا لحد دلوقتى 

والشؤون المعنوية اللى شغاله لعب فى دماغ الناس 

عاملين حملةاعلانية  بعنوان (كل كلمة بثمن الكلمة تنقذ وطن)  تحظر الناس من اسلاحتنا

دول اتنين من تلاته الاعلانات دى مش بس بتتذاع على التليفزيون المصرى لاء والقنوات الخاصة كمان 

اوعى تتكلم مع حد متعرفوش مع اننا كنا بنتكلم مع بعض فى اعظم 18 يوم من غير منعرف بعض

اوعى تتكلم فى السياسة، كلامك فى السياسة بتستخدمه دول تانية ضدنا مع ان عدونا اكبر حليف للدول دى ضدنا

ومع ان الجرايد فيها كل حاجه بس انت تتكلم لالالالالالا

اقفل على نفسك واسكت علشان كل البلد جواسيس ولما تشوف واحد عنيه ملونه وشعره اصفر اجرى او امسكه علشان تبقى مواطن شريف وسلملى على السياحة

خاف خاف من كل واحد مش شكلك خاف من كل واحد يخلفك فى الرأى خاف من أخوك المصرى وأخوك الإنسان

وخلى بالك اصلا كلامك ممكن يكون اشاعات والاشاعات بتضر البلد يرضيك تضر البلد يا مواطن

اما النت بقه وبياناتك اللى عليه فأصلا كل دول العالم مستنياك علشان تاخد معلوماتك من عليه فبلاش اوعى تدور على شغل على النت اوعى تشوف العالم اقفل على نفسك وارضى بقليلك ومتشوفش ومتعرفش ومتتكلمش

خليك فى دايرتك الصغيرة اوعى تخرج منها اوعى تكبرها.

ارجع زى زمان  ساكت مبتحلمش ومبتفكرش شد اللحاف ونام يا مواطن

هو مش كان فى مستندات تم تسريبها تفيد بان المخلوع والعادلى سلموا المباحث الفيدرالية جميع بيانات المصريين اللى من ضمنها ارشيف الرقم القومى وقاعدة البصامات والتسجيل الجنائى؟!!!!!

بغض النظر إن كان المستندات دى موجودة ولا لاء؟ ولو موجوده صحيحة ولا لاء؟

لكن ليه معرفناش؟عارفه انها موضوع زى مواضيع كتير بنتكلم عنها يوم واتنين وننسى 

وإن لو حتى فى بلاغ بده فمش وقته دلوقتى علشان مشغولين بالمقر شفيق اللى اتحرق والمدرعة اللى اتسرقت

بس كلامك انت بقه فى الشارع وفى النت وفى اى حته خطير على آمن الوطن.

الاعلانات دى مينفعش رد فعلنا عليها يبقى ضحك وتريأة وفضح للممثلين اللى فيها

الاعلانات دى اخطر مما نتصور ولازم يترد عليها.

Leave the safe zone, Trust the danger, Love the adventure.

ميدانى...ثورتى

ما بال هؤلاء الناس هل فقدوا عقولهم!!!

يتسألون فى حيرة من أمرهم أين ذهب الميدان؟!

الجميع متفق "هذا ليس ميدانى"

جمعوا على أنهم أصبحوا غرباء فيه

ينظرون إلى بعضهم البعض وعلامات التعجب تعلو وجوهم 

يطوفون بكعكته الحجريه ولا يشعرون بشئ سوا الإغتراب

يهتفون من حناجرهم وقلوبهم غافيه

ثم يرحلون فى إستياء بعد أن أعياهم التعب وجهد إنتقاد الآخر

ثم يتسألون أين الميدان!!! ويبدأون فى رحلة لوم الآخر التى لا تنتهى

هل نسيتم أن الميدان ما هو إلا أحجار؟! فهل أبدل العسكر تلك الأحجار  فشعرتم بالغربه به؟ 

هل نسيتم أنكم بروحكم، برقيكم، بأحلامكم، بإنسانيتكم من صنعتم من الميدان أرض اليوتبيا؟!

هل نسيتم أنكم أنقى من فى هذا العالم وأطهر من فيه؟!

هل نسيتم قوتكم وقتما كنت صف واحد؟!

هل نسيتم سعادتكم عندما ترفعتم عن كل صغير؟

أسمع من يتكلم عن الأطماع السياسية والمنافقون والصراع على السلطة؟

أقوله لا تناقشنى فى تفاصيل سياسية ،لا تناقشنى فى أطماع النفس البشرية

واحترم قدسية ما أتحدث عنه

إنى أتحدث عن الحلم،عن الثورة،عن دماء سالت بعزة وبدون ذرة تردد وبدون أن تهوى النفس وتشتاق للكرسى

أتحدث عن الكل وليس الجزء عن الصورة كلها لا التفاصيل 

ثم ما بالك متعجب من هؤلاء الطامعين؟هل صدمك هذا أين كنت قبل الثورة وأين كانوا؟! ألم تكن تعش معانا

لم يتغيروا هم ألا تصدقنى 

قل لى لماذا لم يثورا من قبل؟! لم يتغيروا هم

إن ما يحدث الآن ما هو إلا فرز ثورى 

ثورتنا تنقى ما علق بها من أطماع لتبقى على الثوار الحقيقيون 

فتمسكوا جيدا بثورتكم تمسكوا بالحلم تمسكوا بالمستحيل 

واستقيموا وادفعوا هوى النفس بعيدا 

أحبوا اعدائكم يرحمكم الله

هتألم

وحشة اوى فكرة تعود الالم دى
بعد فترة بتحس انك مش حاسس حاجه وبتفضل تقول عادى يعنى
عمرى ماخدت بالى قبل كده اننا مش المفروض نتعب  علشان منحسش بالالم
اد ما  المفروض نتعب علشان يفضل احساسنا بالالم زى اول مرة
مجنونه الفكرة جايز،مؤلمة أكيد

بس تخيل كده او متتخيلش راجع حياتك  وافتكر مواقف مؤلمة اتكررت وشوف درجة احساسك الالم

طب افتكر اول يوم بشار ضرب المتظاهرين بوحشية افتكر احساسنا، معلش تذكر الألم بيوجع بس جرب
وافتكر احساسك النهاردة الصبح وانت بتتفرج على مجازر ابشع!!!
طب بلاش خلينا فى حاجه تمسك بشكل مباشر
ليه اول قصة حب بتبقى مؤلمة؟!
ليه اول مشكلة فى الشغل بتبقى اصعب مشكلة؟!

اول مرة تحس طعم الفشل بيبقى علقم؟
اول طعنة غدر تحس انك هتموت من القهر؟
الاجابة تعود الالم للاسف

نرجع لفكرتى اه لازم نناضل علشان نفضل نحس الوجع بنفس درجة اول مرة ،لازم منتعودش على الألم
علشان لو اتعودنا على ظلم العسكر مش هنثور تانى
علشان لو اتعودنا على منظر القبح مش هنجمل
علشان لو اتعودنا على ألم الحب مش هنحب بوهج المرة الأولى
علشان منتلجش وبيقى كل حاجه عادى
علشان الالوان متبقاش باهته متبقاش رمادى،علشان تفضل ابيض واسود واحمر واخضر وازرق

علشان كده كل لما هشوف اخبار سورية هغضب وادعلهم بحرقة وادعى على بشار واحاول اعمل اى حاجه
علشان كده كل لما اللى فى السلطة يبعوا دمنا هثور عليهم، هتكلم وههاجم وهتظاهر وعمرى ما هقول مفيش فايدة
علشان كده لما احب ولا اطولش هعيط واكتئب واحزن

علشان كده كل لما حد يضايقنى فى الشارع هرد عليه وهشتمه لحد ما يتعلموا الادب
علشان كده لما افشل هضايق واسمع مزيكا حزينة وادعى بحرقة
علشان كده كل لما اشوف زبالة فى الشارع وعمارات الوانها وحشة واغانية سوقية هضايق بنفس درجه اول مرة
صدق اللى قال الالم نعمة.

لا يعود شئ يخيف إن صرناه.

الكلمات من كتاب صديقى الله "لزياد رحبانى"
والصورة بريشة "وليد طاهر"

قلت لهم
ألا تسكرون الأبواب
العاصفة هنا عند المفرق
وقالوا:
على مر الأيام تعودت الأبواب
وسوف تتسكر وحدها عندما ترى العاصفة

قلت: ألا تسكرونها أنتم بأيديكم القوية
قالوا:مللنا الحياة
امتلأت الأرض بالشتائم والكلام
صاروا يعدون ذكياً من يكفر أحسنهم بالله
ذكياً الذى كلامه اكثر الكلام سفالة

آه لو كان الكلام كالخبر يشرى
فلا يستطيع أحد أن يتكلم
إلا إذا اشترى كلاما

وقلت لهم
ألا تسكرون الأبواب
فقالوا:
ليت كل همومنا أبواب للتسكير.

**********

أليس فى كل ثانية من الحياة
إنسان يضحك؟
إذن فى الأرض ضحك متواصل !

**********

فى الأرض ليس من كُتًاب
كلنا كُتًاب
نكتب حياتنا على الأيام
وكلُ يخاف على حبره
ولا يعطى منه الآخر
ومتى انتهى دمع الكتاية
انتهى كاتب من الكتاب
نبكى عليه وننساه
ونتشجع لإكمال الكتابة
وينتهى آخر
ونتجمع فى الزوايا
نشد بعضنا لبعض عًلًنا نبقى

والريح من وراء الأبواب
تنفخ على الحبر لينشف
متى ضاع كاتب من الكتاب
نروح نخاف من فراغ الشوارع
ومقاعد الكنيسة
من هدير البحر نخاف
من الرعد
من النار الخافتة نخاف
نخاف من عيون الخائفين
من الفرح
من تجمُع العصافير

من دقة الباب نخاف
ونهوى السكوت والظلام لكى نسمع الآتى
ولو انه لا يًسمع !

**********

كلهم يعرفون أن دقيقة العمر مرة تأتى
ويعرفون ان الفرح فيها
أحلى من الحزن
لكنهم لا يصدقون أنفسهم.

**********

لا يعود شئ يخيف
إن صرناه.

**********

الأيام ابواب
على كل منها حارس

وقد كُتب علينا

أن نخلق كل يوم                                         

وعلى كل باب

قصة جديدة
نلهى بها الحارس
ليفتح لنا الباب

إلى باب أخر.

That is exactly what I feel long time ago 

غمزة

بقالى يومين بتخيل حاجه والنهاردة الحاجة دى ردت عليا فعلا فى الواقع
شايفه الكون كده بيغمزلى من بعيد وبيقولى قريب
والدنيا شكلها قررت تعاكسنى وتتشاقى معايا شوية
وانا مبسوطة بالشقاوة دى ومستنياها تتشاقى اكتر
مش عارفه ده لاننا فى مارس و بدايات الربيع
ولا ده ربيع فى روحى قلبى
عموما اى كان انا مبسوطة
بركات قميصى الاخضر الجديد .)

 

قميصك الاخضر.. من يا ترى

باعك هذا اللون.. قولى أصدقي

أمن ضفاف (السين) خيطانه

واللون من دانوبه الأزرق

أم من صغير العشب لملمته

في سلةٍ بيضاء من زنبق

نزار – زيتية العينين

          

حاسة انى انا اللى تم اخضاعها لكشف العذرية حاسة انى انا اللى اتظلمت
حاسة ان حد بيلمسنى غصب عنى
حاسة انى بنتهك
حاسة انى بصرخ باعلى صوتى ومحدش سامع حاجه
19 مصرية مش بس تم اخضاعهم فى السجن الحربى لكشف العذرية لاء
النهاردة حاسة ان تم اخضاع كل شريفه وحرة لكشف العذرية بس مش فى اوضه فى سجن حربى
لاء فى ميدان وعلى مرأى ومسمع من الجميع ومش كده وبس بمباركتهم كمان

دموعى رافضة تنزل،رغم انى حاسة بقهر فى ضلوعى
قلب مجروح بس والله ما هتكسر ياكلاب العسكر يا كلاب السلطة
انتهاكوا اجسدنا،عرونا فى الميادين
مش هتنعرفوا تنتهكوا اروحنا ولا افكارنا
ولو مش سامعين صوتنا النهاردة بكرة هتسمعوا
بكرة هيصم ودانكوا ويرهب قلوبكوا
(ويمكرون ويمكر الله والله خير الماكرين)

انا متاكدة جداا انى فى يوم من الايام هحط راسى على المخدة وانا فى قمة السعادة والنجاح

مش بس هكون سعيدة بنفسى وبحياتى لاء وبمصر كمان

رسائل عقلى الباطن

عمرى ما كنت بصدق اوى فكرة ان حد بيتكرر معاه حلم معين،زى ما دايما فى الافلام العربى يجيبوا الدكتور النفسى مكشر كده والبطل/ة على الشازلونج بيحكى عن الحلم المزعج اللى مبيفرقوش،لحد ما حصلى
من حوالى سنتين ابتدى يتكرر معايا حلم معين،فى البداية مكنش مزعج بس كان رد فعلى فى الحلم غريب
كان بيحصل حاجة المفروض انى اخاف منها بس انا مكنتش بخاف.
على مدار السنتين كان بيروح الحلم ده لفترة طويلة وبعدين يرجع تانى ويتكرر فى وقت قصير  بس كل مرة بيكون معدل الخطر ده اعلى وابتدى يزعجنى ابتديت فعلا احس بالخوف
بعد شويه الخطر ابتدى يأذينى فعلا وبعدين معتش بيجيلى الحلم ده الحمدلله بقاله فترة مش قليلة

فجأة كده ادركت حاجه نورت فى دماغى،فجأة فهمت ان الحلم كان عاوز يقولى حاجه
عقلى الباطن كان بيحاول يوصلى رسالة عقلى الواعى مش قادر يدركها
اعقدت افكر فى الحلم بتمعن واربطه باحداث حياتى وامتى كان بيجى وامتى كان بيروح امتى
بدأ يزعجنى
وفهمت واكتشفت كمان ان الاحلام مش بتتفسر(التفسير النفسى) حلم حلم لاء ده ممكن سلسلة احلام تحمل رسالة واحدة
بصراحة حبيت اوى عقلى الباطن .)
واتعلمت اسمعله اكتر بعد كده وافهم اللى عاوز يقولهولى. سبحان الله الخالق

النايبة الإدارية

تليفونى رن رديت وكان الحوار

المتصلة: الو استاذة زينب حطبة

انا :ايوة مين معايا؟

المتصلة:حضرتك كنت عملتى شكوى فى النيابة الادارية ياريت تيجى بكرة فى مكتب ا/فلانة و

انا: شكوى! انا مقدمتش شكاوى

المتصلة:مش حضرتك زينب حطبة و ده تليفونك

انا: ايوة

المتصلة: يبقى حضرتك قدمتى الشكوى

انا: طب ممكن تقوليلى ايه الشكوى اللى انا قدمتها

المتصلة بزهق: لما تيجى هتعرفى

انا: مهو انا مش هفضى نفسى يوم واجى المنصورة علشان شكوى معرفهاش

المتصله مع استمرار الزهق :طب ثانية اشوفهالك
بعد ثانيتين :الشكوى انتى مقدمها فى إدارة موقف كذا بتشتكى من ان الاجرة زادت

انا :ممكن تقوليلى تاريخ الشكوى

المتصلة بقلة ذوق ولا بلاش ذوق دى مش مفروض تكلمنى بذوق خليها بقلة مهنية: يعنى هتفرق معاكى

انا بسخرية: انتى بتتكلمى جد؟!! الشكوى اللى بتتكلمى عليها دى انا مقدمها من سنة؟!!! وانفلت منى ضحكات عالية ، دى الاجرة اللى بتتكلمى عليها دى زادت مرتين؟!! ده انا سايبه الشغلى فى مارس اللى فاتت والشكوى دى كانت قبل ما سيبه

المتصلة: متبقيش تقدمى شكاوى تانى طالما مش قدها

و بمنتهى الشجاعة قفلت السكة فى وشى
طبعا حاولت اتصل مرار وتكرارا فبمنتهى الشجاعة برضو كنسلت ،شوف شو يا مؤمن سبحان الله زمان كان الموظف اللى من نوع ده يدوخك ماشى يقولك استنى افطر،هقمع البامية،هصلى .....
لكن بشجاعة فى وشك مش يعملها ويجرى زى العيال

المهم اعقدت انا بقه افتكر ملابسات الشكوى وهعمل ايه مع الست الهانم دى
وافتكرت ان فى يوم من الايام بعد التنحى مش بكتير خير اللهم اجعله خير وانا راحة شغلى لقيت السواقين كلهم عاملين اضراب ومش عاوزين يشتغلوا الا لما يرفعوا الاجرة
وطبعا لان بعد التنحى كان فى طاقة إيجابية مهولة فى روح أغلب المصريين وإحساس بإن التغيير مننا ومفيش ظلم تانى ومفيش خوف تانى زى ما قالت نوراة كده
الناس مسكتتش لكن بعد ساعة من الشد والجذب وفشل كل المحاولات و ذهابا طاقتنا اللى كنا هنشتغل بيها اصلا هباءا، وبمنطق انى وغيرى خسرنا من الساعة التأخير دى أضعاف اللى سواقين عاوزينه
رضخنا للسواقين بس بشرط اننا هنقدم فيهم شكوى
هنا بقه مربط الفرس

رجعت من شغلى جرى مسكت التليفون واتصلت برقم النيابة الإدارية 16117 وبعد طول انتظار رد عليا أحد الموظفين و للحقيقة انا فاكرة إنى أشدت بمستوى الخدمة و مهنية الموظفين.
وبس فى خضم الاحداث اللى بتحصل فى مصر الثورة ،من فض اعتصام لكشوف عذرية لعباسية لمحمد محمود لبلاد تأخدنى لبلاد تحطنى فى ظل حكم العسكر
نسيت اتتبع الشكوى واصلا أجرة المواصلات فى اغلب مصر زادت بدل المرة اتنين فى خلال السنة
وبس
فى الاول قولت عادى بقه يا زينب موظفة وغلطت وكتير منها موجودين بس اكتشتف ان لاء الكلام ده لو كلمتنى بعد شهر لكن بعد سنة !!!
يبقى ده سيستم مش واحدة
وفكرت هعمل ايه؟! لكن فى الآخر وصلت انى مش هفتت مجهودى وهى حاجه واحدة اللى هفكر فيها
لازم يسقط حكم العسكر... يسقط يسقط حكم العسكر