ما بين مجتمع الغواية ويوتوبيا التحرير

مشهد 1

بتعيطى ليه يابت

أحمد اللى قاعد جنبى فى الديسك ضربنى النهاردة واحنا بنلعب فى الفسحة

طيب خلاص بطلى عياط وأنا هكلم مامته اقولها

مشهد 2

بعد 6 سنيين

أنا مش فاهمه يعنى ايه  مدرسة بنات بس طب وأحمد اللى فضل جنبى 6 سنيين ابتدائى؟! بنذاكر ونلعب و نتخانق ونتذنب كمان مع بعض ؟!

أنتى هبلة يا بنتى مدرسة بنات بس علشان أحنا كبرنا خلاص، ماما قالتلى كده دى حتى منعتى  من اللعب مع اصحابى فى 
النادى. قالتى خلاص اكبرى بقه أنتى بقيتى آنسة بطلى تنطيط وسط الصبيان أنتى واصحابك ؟!!

ايوة يعنى مش فاهمه هيكلونا يعنى طب ما بابا راجل واخواتى والمدرسين وقرايبنا، وعمو البقال، هما الولاد لما يكبروا بيتحولوا يعنى بيخافوا علينا منهم؟!.لما قولت كده لاخويا الكبير قعد يضحك ويقولى لا دول بيخافوا علينا احنا منكوا يا بنات حوا

مشهد3

بعد 9 سنيين

ايه يا بنتى ايه اخبار شغلك ؟

كويس بس فى واحد زميلى كده مش فاهمه هو عاوز ايه؟

ماله يعنى عملك ايه؟

 بيعملنى كويس أوى ومهتم بيه وبيحاول طول الوقت يفتح معايا كلام
وبعدين ؟

وبعدين ايه ؟! بقفل أنا فى الكلام طبعا؟

ليه يا بنتى؟

كده هو فاكر ايه أنا سهل كده اى حد يتكلم معايا؟

اه صحيح ازاى يعمل كده مخدتش باله انك سفير فى هيئة الأمم المتحدة؟! وبعدين فى ايه يا بنتى ما جايز أصلا بيكلمك عادى أنتى اللى مخك بيحدف

عادى يعنى ايه عادى!!

عادى يعنى بيكلمك كبنى آدم يعنى من غير أغراض، وحتى لو له غرض ما غرضه شريف يا حاجه مالك فى ايه؟

ايوه ايوه خليكى أنتى فى الكلام بتاع الكتب بتاعتك والناس اللى بيلبسوا نظارات اللى  بتعقدى معاهم دول، قال كبنى آدم قال أنتى هبل’؟ .عموما كده ولا كده أنا هقفل عليه فى الكلام لو له غرض يبقى يكلم ابويا

يا بتاعه أنتى هو بإسلوبك المتخلف فى التعامل ده هيفهم منه أنك مش طايقه وحتى لو عاوز يتقدملك هيتردد

يا سلام ما أنا لو معملتهوش بتجاهل وقفلت عليه هياخد عنى فكرة غلط

والله أنتى كلك غلط انتوا يا بنتى بتتقابلوا فى الشارع انتوا فى مكتب واحد أصلا. صبرنى يارب

مشهد 4

إزيك يا حبيبتى ايه اخبارك؟

زهقانه وهطق

ليه بس، ده أنتى لسه مخطوبة من أسبوع لحقتى تزهقى؟!

أصلى سبت الشغل؟

ليه يا بنتى؟

مهو خطيبى مش عايزنى اشتغل، مبيحبش الأختلاط وعايز يستتنى فى البيت J
 

هو يا بنتى مش زميلك فى الشغل؟ وبعدين أنتى بتضحكى ومبسوطة على ايه انتوا عاوزين تجننونى

اه زميلى بس أصله  بيقولى الرجالة فى الشغل بتعقد تتكلم على البنات ويقولوا دى حلوة ودى وحشة وأنا محبش حد يتكلم عليكى، وطبعا اتبسطت بقه، بيغير عليا

امممم طيب خليه يخبيك فى البيت بقه اوعى تخرجى لأحسن حد يشوفك

مشهد5

بعد سنتين

ايه يا بنتى بتعيطى ليه ومال منظر كده أنتى مبتنميش ولا ايه؟

أنام؟! أنام ازاى أنا قرفت وزهقت من دى عيشه على الجواز وعلى اللى بيتجوزوا ويخلفوا، الواد ولا كإنه ابنى لوحدى حتى مبيشلهوش منى ساعة أنام ،وياسلام لو جه ملاقش أكل، رجاله كلها أنانية مبيفكرش غير فى أكله ومتعه وبس وأنا مش مهم بحس بإيه ولا بتعب أد إيه ولما اتكلم معاه يقولى زعقى زعقى ويسبنى ويمشى

مهو أنتى لو بتتكلمى معاه بشكلك ده حقه يطفش صراحه

********

شوفت يا معلم الموظفة الجديدة ؟!  مش المناظر اللى فى البيت.

بقولك ايه اتكلم بأدب

 ايه هى الصنارة غمزت؟! يا ابنى خليك بعقلك متعملش زى أخوك دول بيتحولوا بعد الجواز اسألنى أنا. لسه الصبح "سيب فلوس هات بامبرز وانت جاى هو ابنى لوحدى أنا تعبت" اسطوانة لا تنتهى

لاء بصراحة وأنت اللى بقيت قمر بعد الجواز بكرشك ده .

*******************************************************************

رئيس جامعة المنصورة ينفي قرار منع الاختلاط.. وعميد "الطب": راعينا الفصل لتعذر الحركة

مجتمعنا للأسف مليان عقليات مبيحكمهاش غير فكرة واحدة وهى الغواية،الرجالة لازم تخاف من الستات لاحسن تغويهم وتوقعهم فى  شراكها، والستات لازم تخاف من الرجالة لأنها مش عاوزه منها غير حاجة واحدة بس.علشان كده لازم منحطش البنزين جنب النار لأن الأتنين خطر على بعض.

مجتمع بيبصلنا على اننا خطر على بعض، فى نفس الوقت عايزنا نتجوز وننشأ أسر ناجحة، ثم بعد كده يلومنا لو فشلنا فى المهمة دى، ويحتقرنا لو طالبنا بإنهائها. ويحاربنا لو حاولنا ننتمرد على قيوده المتناقضة، ولازم ولا بد علشان ينجح فى الأنتصار علينا أنه يلبس توب الدين علشان كلمته تاخد قدسية  ويطردنا من جنته.

لومتعلمناش من الثورة هنتعلم منين؟ لو محولناش 18 يوم الأولى إلى نموذج نمشى عليه، هنطبق اى نموذج؟! وهل فى نموذج أوضح وأعظم من كده يعبر عننا وعن هويتنا؟ 18 يوم كانت البنات بتنام على الأرصفة ومحدش بيص عليها حتى بعينه! 18 يوم البنت مكنتش خايفة من الولد جنبها كانت بتجرى تسعفه! 18 يوم كنا بنتعامل على الأساس المشترك ما بين اننا بنى ادمين قبل اى اختلاف بيقسمنا؟!
ويفضل السؤال: امتى هنقوم بثورة مجتمعية؟؟؟